Consellería de Economía e Industria
Rueda reitera o compromiso da Xunta co sector da automoción e fai unha petición “práctica” e “non política” ao Goberno central para o reparto dos fondos PERTE
-
O presidente da Xunta salientou na clausura da asemblea de Ceaga que “aínda estamos a tempo de cambiar o sistema de distribución deses miles de millóns de euros en PERTES industriais que seguen na casa de saída”
-
Garante o apoio do Goberno galego “para que este sector tan global siga aumentando a súa competitividade e a creación de emprego”
-
Enxalzou o avance de Galicia nos últimos anos á hora de impartir a formación sectorial dun xeito máis rápido e flexible, para que o persoal poida asumir novos métodos de traballo
O presidente da Xunta, Alfonso Rueda, reiterou o compromiso do Goberno galego de apoiar ao sector da automoción para seguir aumentando a súa competitividade e a creación de emprego. Así o sinalou durante a súa intervención na clausura da asemblea do Clúster da Automoción e da Mobilidade de Galicia (Ceaga), onde precisou que a automoción é un sector clave para a economía e así se vai tratar desde o Goberno galego, referíndose á distribución dos fondos dispoñibles: “Imos priorizar o que temos en manter estes miles de postos de traballo. Imos axudarlles a ser competitivos neste sector tan global”, asegurou.
Neste sentido, o presidente da Xunta evidenciou a necesidade de que desde o Goberno nacional cheguen os fondos PERTE para poder levar a cabo todas as axudas prometidas. “Non é unha petición política, senón práctica. Aínda estamos a tempo de cambiar o sistema de distribución deses miles de millóns de euros en PERTES industriais que seguen na casa de saída”, sinalou o titular do Executivo galego.
Ademais, salientou o avance en Galicia nestes últimos anos á hora de impartir a formación necesaria para adaptarse ás necesidades do mercado, e a importancia de que se dea da forma máis rápida e flexible posible: “Fomos mellorando en algo tan importante como a formación, para ser capaces de impartila rapidamente, cando se necesita formar a ese persoal para que poida asumir novas maneiras de traballar”.
Por último, tendeu a man a Ceaga para seguir colaborando como ata o de agora, e animou ao Clúster a seguir traballando polo ben de Galicia: “Sigan así, movan a economía. Se lles vai ben, a Galicia lle irá ben”.
