Consellería de Economía e Industria
XUNTA E CLÚSTER DA SAÚDE ASINAN UN CONVENIO DE COLABORACIÓN PARA IMPULSAR EN GALICIA A CADEA DE VALOR DO SECTOR BIOTECNOLÓXICO SANITARIO
• O acordo foi suscrito pola conselleira de Economía, Industria e Innovación, María Jesús Lorenzana, e pola presidenta do Clúster da Saúde de Galicia, Rocío Mosquera
• Comporta un orzamento de 228.000 euros e proxecta actuacións para potenciar a innovación e a transferencia de coñecemento entre empresas do sector da saúde e entidades vinculadas como universidades, centros tecnolóxicos e startups
• Este convenio ampliará os servizos que presta o Clúster ao conxunto do ecosistema biotech en Galicia, para mellorar o posicionamento internacional da Comunidade como biorrexión
• Promoverá iniciativas como a prestación de servizos innovadores para financiar actuacións de demostración, de xeito especial entre pemes e investigadores, e a validación de produtos nos living labs de Galicia
• Un dos obxectivos é lograr a acreditación do clúster como Agrupación Empresarial Innovadora estatal recoñecida polo Ministerio de Industria e Turismo
• Enmárcase nos obxectivos da Estratexia de Consolidación da Biotecnoloxía en Galicia 2021-2025 e nos retos da RIS3 sobre desenvolvemento dun modelo de vida saudable e de envellecemento activo
A conselleira de Economía, Industria e Innovación, María Jesús Lorenzana, en representación da Axencia Galega de Innovación (Gain), e a presidenta do Clúster da Saúde de Galicia, Rocío Mosquera, asinaron un convenio de colaboración polo cal ambas as dúas entidades se comprometen a traballar conxuntamente para impulsar en Galicia a cadea de valor do sector biotecnolóxico sanitario.
O acordo, que comporta un orzamento total de 228.000 euros e se estende ata o ano 2025, contempla a realización de diversas actuacións para potenciar a innovación e a transferencia de coñecemento entre empresas do sector da saúde e demais entidades vinculadas, como universidades, centros tecnolóxicos e startups, entre outros.
O obxectivo é ampliar os servizos que o Clúster da Saúde presta ao conxunto do ecosistema biotech en Galicia en materia de innovación, para mellorar o posicionamento internacional da Comunidade como biorrexión. Neste sentido, unha das metas é acadar a acreditación do clúster como Agrupación Empresarial Innovadora estatal recoñecida polo Ministerio de Industria e Turismo.
SERVIZOS INNOVADORES
O texto prevé, entre outros, a prestación de servizos innovadores para financiar actuacións de demostración, especialmente entre pemes e investigadores, e a validación de produtos nos living labs de Galicia. En definitiva, reforzar o papel do Clúster da Saúde de Galicia na dinamización e seguimento do subsector biotecnolóxico aplicado á saúde, para o cal o convenio contempla a realización de diversas campañas de comunicación e difusión das capacidades do ecosistema, así como das oportunidades de transferencia e colaboración entre os seus axentes.
Este acordo enmárcase nos obxectivos da Estratexia de Consolidación da Biotecnoloxía en Galicia 2021-2025 e nos retos da RIS3 relativos ao desenvolvemento dun modelo de vida saudable e de envellecemento activo, aproveitando a tecnoloxía e a I+D+i e incluíndo a medicina de prevención, rexenerativa e de precisión e a economía dos coidados.
