Consellería de Economía e Industria

• O prazo de presentación das solicitudes rematará o 30 de maio, dentro dunha convocatoria na que son subvencionables as actuacións que se executen en zonas rurais e que fixen un investimento mínimo de 5.000 euros

• Estes apoios permitirán mobilizar 4,3 millóns de euros e lograr un aforro de enerxía anual equivalente a 264.000 litros de gasóleo, cun impacto na redución de CO2 comparable á plantación de 36.000 árbores

• As axudas están orientadas á promoción de enerxía renovable eléctrica mediante xeración fotovoltaica ou miniéloica, e a proxectos de mellora da eficiencia enerxética, con contías que oscilan entre o 30 e o 50% do custo

• Na selección dos proxectos valoraranse as características técnicas e haberá prioridade para solicitudes procedentes de explotacións inscritas no Reaga (Rexistro de Explotacións Agrarias de Galicia)

A Consellería de Economía e Industria, a través do Instituto Enerxético de Galicia (Inega), ten en marcha unha nova convocatoria de axudas dotada con 1,27 millóns de euros co obxectivo de que empresas e autónomos do ámbito agrícola primario poidan optimizar o seu consumo enerxético e desenvolver proxectos de enerxías renovables eléctricas.

Os apoios, que poden solicitarse ata o vindeiro 30 de maio, favorecerán a mobilización de 4,3 millóns de euros e un aforro de enerxía anual equivalente a 264.000 litros de gasóleo. Neste sentido, os beneficiarios aforrarán uns 400.000 euros ao ano no abastecemento enerxético grazas a estes apoios, mentres que o impacto na redución de CO2 é o equivalente a plantar 36.000 árbores. En concreto, apoiarase a promoción de enerxía renovable eléctrica mediante instalacións fotovoltaicas ou minieólica, e actuacións de mellora da eficiencia enerxética.

Mediante esta convocatoria, en concorrencia competitiva e financiada con fondos FEADER, serán subvencionables actuacións que se executen en zonas rurais e teñan un investimento mínimo de 5.000 euros por solicitude (IVE non incluído). A contía da axuda é do 30% do custo elixible no caso de grandes empresas, do 40% para medianas e do 50% para pequenas empresas, cun máximo de 100.000 euros por proxecto e de 300.000 euros por empresa, salvo no suposto de instalacións de autoconsumo colectivo no que se establece unha axuda máxima de 500.000 euros por proxecto e por empresa.

MELLORA SOCIOECONÓMICA DAS ÁREAS RURAIS

Con esta convocatoria búscase reducir os custos enerxéticos e a factura de enerxía das empresas e autónomos do sector agrícola primario galego para mellorar a súa competitividade, diminuír o consumo de enerxías convencionais para reducir a dependencia enerxética dos derivados de petróleo, aumentando a eficiencia enerxética e promovendo a introdución da mellor tecnoloxía dispoñible, e propiciar unha mellora socioeconómica das áreas rurais e a súa protección ambiental.

Á hora de seleccionar os proxectos, ademais de valorar as características técnicas dos mesmos, primaranse as explotacións inscritas na sección de explotacións agrarias prioritarias do Rexistro de Explotacións Agrarias de Galicia (Reaga). Tamén se outorgarán puntos en función da renda dispoñible bruta por habitante do concello no que se desenvolvan, priorizando os que se ubiquen en zonas economicamente menos favorecidas.

• O presidente da Xunta salientou na clausura da asemblea de Ceaga que “aínda estamos a tempo de cambiar o sistema de distribución deses miles de millóns de euros en PERTES industriais que seguen na casa de saída”

• Garante o apoio do Goberno galego “para que este sector tan global siga aumentando a súa competitividade e a creación de emprego”

• Enxalzou o avance de Galicia nos últimos anos á hora de impartir a formación sectorial dun xeito máis rápido e flexible, para que o persoal poida asumir novos métodos de traballo

• A directora do Igape encabezou unha reunión de traballo coa delegación brasileira para afondar no investimento e nos mecanismos de apoio a pemes e autónomos

• Covadonga Toca agradeceu a mostra de interese de Sebrae no modelo galego e puxo en valor a importancia da cooperación público-privada para o desenvolvemento de proxectos

• Na xuntanza acordouse seguir estudiando vías de colaboración e estreitando as relacións bilaterais para fomentar a expansión internacional das empresas de ambos territorios

• O encontro contribúe a reforzar a xa destacada relación comercial entre Galicia e Brasil, materializada nos dous últimos anos en exportacións galegas por valor de preto de 170 millóns de euros

A directora do Igape, Covadonga Toca, participou nun encontro de traballo con representantes do Sebrae -Serviço Brasileiro de Apoio às Micro e Pequenas Empresas- na procura de explorar vías de negocio e oportunidades de colaboración co país suramericano. A reunión permitiu afondar tanto nas posibilidades de investimento como nos mecanismos de apoio a pemes e autónomos que cada ano promove o Igape, amosando a delegación brasileira un especial interese na aposta pola innovación, a dixitalización e a internacionalización de Galicia.

Covadonga Toca agradeceu a Sebrae este mostra de interese e puxo en valor a importancia da cooperación público-privada para o desenvolvemento de proxectos, tal e como está a facer Galicia nos mencionados ámbitos.

Así, a directora detallou que o Igape conta con diferentes programas para pemes e autónomos entre os que destacou, no ámbito da internacionalización, as liñas Galicia Exporta, tanto para empresas como para organismos intermedios, para promover a diversificación de mercados e a internacionalización de pemes e autónomos galegos; ou a liña de xestores de internacionalización, para facilitar a contratación de profesionais con formación ou experiencia en comercio exterior.

Ademais salientou o papel das antenas do Igape en México, EEUU (Miami), Marrocos, China e Emiratos Árabes, cuxo obxectivo, explicou, é “potenciar as relacións comerciais e incrementar as exportacións das empresas galegas a estes mercados, de cara a identificar oportunidades de negocio, atender a demanda de información e ofrecer servizos de apoio á internacionalización”.

Así mesmo, a directora do Igape lembrou outras liñas de actuación, como a nova edición do programa ReAcciona, que permitirá apoiar a posta en marcha de proxectos centrados na mellora da competitividade das pemes galegas, facilitándolles o acceso a servizos de alto valor engadido co apoio de expertos, ou no eido do emprendemento innovador, a primeira liña específica de apoio ás startups galegas e a rede de business factories, nos ámbitos da automoción, a alimentación ou o aeroespacial.

PRÓXIMOS ACORDOS DE COOPERACIÓN

O encontro permitiu afondar neste tipo de ferramentas e reforzar a xa importante relación comercial entre ambas rexións, que se materializa, nos dous últimos anos, en preto de 170 millóns exportados ao Brasil por parte das empresas galegas, facendo deste un dos principais mercados de América no que ás vendas ao exterior da comunidade se refire.

Ao remate da xuntanza, acordouse continuar analizando os temas intercambiados de cara a poder establecer no curto prazo algún acordo de cooperación en asuntos de interese recíproco, que permita estreitar as relacións bilaterais e incrementar as oportunidades das empresas dos dous territorios na súa expansión internacional.

• A conselleira de Economía, Industria e Innovación define esta cita de referencia do food service do noroeste peninsular como oportunidade para poñer en valor “a excelencia e singularidade” dos produtos agroalimentarios galegos

• Engadiu ademais que este evento que se celebra ata o 9 de abril contribúe ao obxectivo de seguir avanzando na internacionalización da marca Galicia Calidade

• O Fórum Gastronómico 2024 da Coruña recibiu máis de 9.000 visitas nas primeiras horas, e na edición anterior rexistrou 22.000 visitantes e congregou a 200 expositores, 65 poñentes e 30 Estrellas Michelin